တပ်မတော်၏ စစ်ရေးလှုပ်ရှားမှုများ ချက်ချင်းရပ်တန့်ရန် ‘ဝ’ ပြည် သွေးစည်းညီညွတ်ရေးတပ်ဖွဲ့ တောင်းဆို

ရန်ကုန်၊ အောက်တိုဘာ ၇
ရှမ်းပြည်နယ် အပါအဝင် ဒေသအချို့၌ မြန်မာ့တပ်မတော်က တိုင်းရင်းသား လက်နက်ကိုင်များအပေါ် အင်အားထောင်ချီသုံး၍ တိုက်ခိုက်နေသော စစ်ရေးလှုပ်ရှားမှုများ ချက်ချင်းရပ်တန့်ရန် ‘ဝ’ ပြည် သွေးစည်းညီညွတ်ရေးတပ်ဖွဲ့ (UWSA) ကတောင်းဆိုကြောင်း ထုတ်ပြန် ကြေညာသည်။
ရှမ်းပြည်နယ်အတွင်း အောက်တိုဘာလဆန်းက ဖြစ်ပွားသော တပ်မတော်နှင့် ရှမ်းပြည်တပ်မတော် (SSPP/SSA) တို့အကြား တိုက်ပွဲများနှင့် ပတ်သက်၍ UWSA က ရှမ်းပြည်နယ် အထူးဒေသ (၄) SSPP/SSA အဖွဲ့နှင့် ပူးတွဲ၍ အောက်တိုဘာလ ၅ ရက်နေ့တွင် ယင်းသို့ ထုတ်ပြန် တောင်းဆိုခြင်း ဖြစ်သည်။

ပြည်ထောင်စုအဆင့် အပစ်ရပ်စာချုပ် ချုပ်ဆိုထားသော ရှမ်းပြည်တပ်မတော် (SSPP/SSA) တပ်ဖွဲ့များကို တပ်မတော်က အင်အားထောင်ချီ
အသုံးပြု တိုက်ခိုက်ခြင်း၊ စက်တင်ဘာလ နှောင်းပိုင်းအတွင်း ငြိမ်းချမ်းရေး အဖွဲ့အစည်းအချို့အပေါ် တိုက်ခိုက်ခြင်း တို့ကြောင့် ငြိမ်းချမ်းရေး လုပ်ငန်းစဉ်အပေါ် ကြီးမားစွာ ဂယက်ရိုက်စေကြောင်း အဆိုပါ ကြေညာချက်တွင် ဖော်ပြထားသည်။
အချက်လေးချက်ပါ ထုတ်ပြန်ချက်တွင် စစ်ရေးလှုပ်ရှားမှုများ ရပ်ဆိုင်းရန်အပြင် အောက်တိုက်ဘာလ ၂ ရက်နေ့ နောက်ပိုင်း သိမ်းပိုက်ထားသော ဒေသများနှင့် စခန်းများမှ ဆုတ်ခွာပေးရန်နှင့် ပြည်တွင်း ငြိမ်းချမ်းရေးကို ထိခိုက် ပျက်ပြားစေသော အပြောအဆို အပြုအမူများကို ပြတ်ပြတ်သားသား ဆန့်ကျင်ကြောင်း ထည့်သွင်း ဖော်ပြထားသည်။
တပ်မတော်နှင့် SSPP/SSA တို့ အောက်တိုဘာလဆန်းတွင် တိုက်ပွဲများ ဖြစ်ပွားသော်လည်း လက်ရှိအချိန်တွင် အခြေအနေများ ပြန်လည် တည်ငြိမ်နေပြီ ဖြစ်ကြောင်း ပြည်တွင်း ငြိမ်းချမ်းရေး အကျိုးဆောင်တစ်ဦးက မှတ်ချက်ပြုသည်။
တပ်မတော်နှင့် SSPP/SSA တို့ ရှမ်းပြည်နယ်တောင်ပိုင်း ကျေးသီးမြို့နယ်အတွင်း ပစ်ခတ် တိုက်ခိုက်မှုများကြောင့် တပ်မတော်မှ အရာရှိတစ်ဦး အပါအဝင် လေးဦးကျဆုံးခဲ့ပြီး SSPP/SSA တပ်စွဲထားသော တာဖာဆောင် တံတားကို ပြန်လည် သိမ်းပိုက်ခဲ့သည်။
‘ဝ’ ပြည်သွေးစည်း ညီညွတ်ရေးပါတီ UWSP/UWSP သည် အစိုးရနှင့်၂၀၁၂ ခုနှစ်တွင် ပြည်ထောင်စုအဆင့် အပစ်အခတ်ရပ်စဲရေး လက်မှတ် ရေးထိုးထားပြီး၊ တပ်မတော် ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်နှင့် လေးကြိမ်ခန့် တွေ့ဆုံထားကာ နိုင်ငံလုံးဆိုင်ရာ အပစ်အခတ် ရပ်စဲရေးစာချုပ် ချုပ်ဆိုရန် အသင့်ဖြစ်နေပြီ ဖြစ်ကြောင်း ကြေညာထားသည့် လက်နက်ကိုင် တပ်ဖွဲ့တစ်ခု ဖြစ်သည်။

Credit - The Voice Weekly