ရန်ကုန် (မဇ္ဈိမ) ။ ။ ယခုလ ၁၀ရက်နေ့က သမ္မတအိမ်တော်တွင်ပြုလုပ်သည့် ခြောက်ပွင့်ဆိုင်ဆွေးနွေးပွဲသို့ တိုင်းရင်းသားကိုယ်စား ပြု တက်ရောက်ခဲ့သည့် ရခိုင်တိုင်းရင်းသားအမတ်ဖြစ်သူ ဒေါက်တာအေးမောင်အနေဖြင့် ဆွေးနွေးပွဲရလာဒ်ကို တစ်စုံတစ်ရာရှင်းပြခဲ့ခြင်း အလျဉ်းမရှိဟု ရှမ်းတိုင်းရင်းသားများဒီမိုကရေစီအဖွဲ့ချုပ်(SNLD)က ဧပြီ ၂၂ရက်တွင် ကြေငြာချက်ထုတ်ပြန်လိုက်သည်။
"ရှမ်းတိုင်းရင်းသားများဒီမိုကရေစီအဖွဲ့ချုပ်အနေဖြင့် ဒေါက်တာအေးမောင်နှင့်တွေ့ဆုံဆွေးနွေးမှု တစ်ကြိမ်တစ်ခါမျှ မရှိခဲ့ပါ။ ခြောက်ပွင့်ဆိုင်တွေ့ဆုံပွဲသို့ တက်ရောက်စဉ်ကလည်း
ရှမ်းတိုင်းရင်းသားများဒီမိုကရေစီအဖွဲ့ချုပ်အား ကိုယ်စားပြု တက်ရောက်ခဲ့ခြင်း မဟုတ်ပါ။ ဆွေးနွေးပွဲပြီး ပြန်လည်ရှင်းပြသည်ဟု ဆိုရာတွင်လည်း ရှမ်းတိုင်းရင်းသားများဒီမိုကရေစီအဖွဲ့ချုပ်အား ရှင်းပြခြင်းလုံးဝမရှိခဲ့ပါ" ဟု SNLD၏ ကြေငြာချက်တွင် ဖော်ပြထားသည်။
ခြောက်ပွင့်ဆိုင်ဆွေးနွေးပွဲရလာဒ်များကို တိုင်းရင်းသားများအား ပြန်လည်ရှင်းပြပြီးဖြစ်သည်ဟု ဧရာဝတီသတင်းဌာနနှင့် အင်တာဗျူးတွင် ဒေါက်တာအေးမောင်၏ ပြောဆိုချက်အပေါ် SNLDက ကြေငြာချက် ထုတ်ခဲ့ခြင်းဖြစ်သည်။
ထို့ပြင် တိုင်းရင်းသားပါတီများနှင့် သဘောတူထားသည့် အကြောင်းအရာများကိုသာ ခြောက်ပွင့်ဆိုင် တွေ့ဆုံပွဲတွင် ဆွေးနွေးခဲ့သည်ဟု ဒေါက်တာအေးမောင်၏ ပြောဆိုချက်သည်လည်း SNLD က ၎င်းတို့ပါတီနှင့် လုံးဝ သက်ဆိုင်ခြင်းမရှိဟု ကြေငြာချက်တွင် ပါရှိသည်။
"ဆွေးနွေးပွဲမှာ ကျွန်တော် တင်ပြခဲ့တဲ့ ကိစ္စအားလုံးဟာ ဘောင်မလွတ်ဘူး။ တိုင်းရင်းသားပါတီတွေနဲ့ ဆွေးနွေးပြီးသား ကိစ္စတွေကို စာအုပ်တအုပ် ကျွန်တော်တို့ ပြုစုထားတာ ရှိပါတယ်။ အဲဒီဘောင်ထဲကပဲ ကျွန်တော်ပြောခဲ့တာပါ။ သူတို့လည်း သဘောပေါက်ပါတယ်။ Agree ဖြစ်ပြီးသား စကားလုံးတွေကိုပဲ ကျွန်တော်ပြောခဲ့တာပါ" ဟု ဧရာဝတီသတင်းဌာနနှင့် အင်တာဗျူးတွင် ဒေါက်တာအေးမောင်၏ ပြောဆိုချက်အပေါ် အထက်ပါအတိုင်း ကြေငြာချက်ထုတ်ခဲ့ခြင်းလည်း ဖြစ်သည်။
အဆိုပါ ကြေငြာချက်နှင့်ပတ်သက်ပြီး ဒေါက်တာအေးမောင်ကို မဇ္ဈိမက ဆက်သွယ်မေးမြန်းရာ "ကျားဖြူ(SNDP)ကထုတ်ရင် ရှင်းလို့ရတယ်။ ကျားဖြူမဟုတ်ဘဲနဲ့ SNLD ဆိုရင် မဆိုင်ဘူး" ဟုဆိုကာ"ခင်ဗျားမေးတာ နောက်မှပြောမယ်။ ကျွန်တော်လည်း မအားဘူး" ဟုသာ ဖြေကြားခဲ့သည်။
Credit - Mizzima News
No comments:
Post a Comment