ကိုယ်ကျိုးစီးပွား ကာကွယ်ခြင်း၏ အန္တရာယ်

ကမ္ဘာပေါ်ရှိ နိုင်ငံတိုင်းသည် နိုင်ငံတကာနှင့် ဆက်ဆံသည့်အခါတိုင်း မိမိတို့၏ ကိုယ်ကျိုးစီးပွားကို နံပါတ်တစ်ထား စဉ်းစားတတ်ကြသည်။ ထိုနည်းတူစွာ အခြားနိုင်ငံသားများနှင့် မိမိနိုင်ငံသား နှိုင်းယှဉ်လျှင်လည်း မိမိနိုင်ငံသားကိုသာ ရှေ့တန်းတင် ဦးစားပေးလေ့ ရှိသည်။ လူတစ်ဦးချင်းစီ အနေနှင့် ကြည့်လျှင်လည်း မိမိအတ္တ ကိုယ်ကျိုးကို အဓိက ဦးတည်စဉ်းစားခြင်းမှာ မငြင်းနိုင်သည့် လူ့သဘာဝ ဖြစ်သည်။


သာမန်အားဖြင့် မိမိကိုယ်ကျိုးနှင့် မိမိနိုင်ငံ အကျိုးစီးပွားကို ဦးစားပေးခြင်း၊ ကာကွယ်ခြင်းမှာ သဘာဝကျပြီး နားလည်လက်ခံပေး၍ ရသော်လည်း မိမိအကျိုးအလို့ငှာ တစ်ပါးသူ အကျိုးစီးပွား ထိခိုက်စေခြင်း၊ မိမိကိုယ်ကိုယ် ကာကွယ်ရန် တစ်ပါးသူကို နစ်နာစေခြင်းကိုမူ နားလည်ပေး၍ မဖြစ်နိုင်ပေ။

ပြီးခဲ့သည့် ရက်ပိုင်းအတွင်းက ထိုင်းနိုင်ငံ လိပ်ကျွန်းတွင် ဗြိတိန်နိုင်ငံသားနှစ်ဦး အသတ်ခံရမှုနှင့် ပတ်သက်ပြီး ထိုင်းရဲတပ်ဖွဲ့က မြန်မာနိုင်ငံသားနှစ်ဦးကို စွပ်စွဲဖမ်းဆီးထားသည့် ကိစ္စတွင် အမှန်တကယ် ပြစ်မှုကျူးလွန်ထားခြင်း မရှိဘဲ ဖိအားပေးပြီး အတင်းအကျပ် ဝန်ခံခိုင်းကြောင်း ပေါ်ပေါက်သွားခဲ့သည်။

ယင်းအချက်ကိုမူတည် စဉ်းစားကြည့်ပါက ထိုင်းရဲတပ်ဖွဲ့သည် အမှန်တကယ် ပြစ်မှုကျူးလွန်သူကို သိနေသော်လည်း ထိုင်းနိုင်ငံ၏ ဂုဏ်သိက္ခာကို ကာကွယ်လိုခြင်း သို့မဟုတ် လာဘ်စားမှုဖြင့် နာမည်ကျော်သော ထိုင်းရဲတပ်ဖွဲ့က ပြစ်မှုကျူးလွန်သူထံမှ လာဘ်ငွေ ရယူထားဖွယ်ရှိခြင်း၊ ထိုဒေသ၏ ခရီးသွားလုပ်ငန်းအပေါ် ထိခိုက်သွားနိုင်သောကြောင့် ထိုင်းနိုင်ငံသား မဟုတ်သူများအပေါ် တရားခံလွှဲချလိုခြင်း၊ ဗြိတိန်နှင့် ဆက်ဆံရေး ထိခိုက်သွားနိုင်သော်လည်း သတ်သူတရားခံမှာ ထိုင်းနိုင်ငံသား မဟုတ်လျှင် ထိခိုက်မှု သက်သာနိုင်ခြင်း စသည့် ဖြစ်နိုင်ခြေ စဉ်းစားဖွယ်ရာများ ပေါ်ထွက်လာသည်။

ဆိုလိုသည်မှာ မိမိအကျိုးစီးပွားကို ကာကွယ်လိုသောကြောင့် တစ်ပါးသူ အကျိုးစီးပွားကို ထိခိုက်စေခြင်း ဖြစ်သည်။ ထိုင်းရဲတပ်ဖွဲ့သည် ယင်းနိုင်ငံအတွင်းရှိ မြန်မာရွှေ့ပြောင်း လုပ်သားများအပေါ် မည်သို့ သဘောထား ဆက်ဆံနေသည်မှာ ကာယကံရှင်များသာမက ထိုင်းနိုင်ငံသားများရော၊ နိုင်ငံတကာကပါ သိရှိထားပြီးဖြစ်ရာ ထိုင်းရဲတပ်ဖွဲ့သည် လက်ရှိ ပြဿနာကို မြန်မာနိုင်ငံသားနှစ်ဦးထံ ပုံချလိုက်ရန် စဉ်းစားထားဖွယ် ရှိသည်။

သို့သော် ထိုင်းရဲတပ်ဖွဲ့ မသိရှိသည်မှာ လက်ရှိ အရပ်သားအသွင်ပြောင်း မြန်မာအစိုးရသည် ယခင်အစိုးရကဲ့သို့ မြန်မာနိုင်ငံသား ရွှေ့ပြောင်းလုပ်သားများ အရေးကို လျစ်လျူရှုထားမည် မဟုတ်ဘဲ တတ်နိုင်သမျှ ကာကွယ်စောင့်ရှောက်လာသည် ဆိုသော အချက်ပင် ဖြစ်သည်။ ထိုအချက်ကို မြန်မာနိုင်ငံကို အလည်အပတ် လာရောက်ခဲ့သည့် အာဏာသိမ်း ထိုင်းတပ်မတော် ခေါင်းဆောင်ဟောင်း လက်ရှိ ထိုင်းဝန်ကြီးချုပ် ပရာယွတ် ချန်အိုချာအား သမ္မတဦးသိန်းစိန်နှင့် ဗိုလ်ချုပ်မှူးကြီး မင်းအောင်လှိုင်တို့က လူသတ်မှု အစွပ်စွဲခံ မြန်မာနှစ်ဦးကိစ္စ အလေးပေး ပြောဆိုခဲ့ခြင်းက သက်သေပြခဲ့သည်။

ထိုင်းဖွဲ့စည်းပုံ အခြေခံဥပဒေကို ဆန့်ကျင်ကာ အရွေးကောက်ခံ အရပ်သားအစိုးရထံမှ အာဏာသိမ်းယူထားသည့် လက်ရှိ ယူနစ်ဖောင်းချွတ် ထိုင်းအစိုးရသည် ၎င်းတို့၏ အရုပ်ဆိုးသော လုပ်ရပ်များကို ကာကွယ်ရန်နှင့် ထိုင်းနိုင်ငံသားများနှင့် ထိုင်းနိုင်ငံ၏ အကျိုးစီးပွားကို ကာကွယ်ရန် ပြစ်မှုမကျူးလွန်သော မြန်မာနိုင်ငံသားနှစ်ဦးကို သံသယဖြင့် ဖမ်းဆီးချုပ်နှောင်၊ အရေးယူ အပြစ်ပေးရေးအတွက် ရှေ့ဆက်တိုး လုပ်ဆောင်မည် ဆိုပါက နှစ်ဖက်အစိုးရများ အကြားတွင်သာမက နိုင်ငံသားအားလုံးနှင့် ဆိုင်သည့် အမျိုးသားရေး ပြဿနာတစ်ရပ်ဆီသို့ ရောက်ရှိသွားနိုင်ကြောင်း သိစေအပ်ပေသည်။

အယ်ဒီတာ (၂၃-၁၀-၂၀၁၄)

--------------------------------
The Voice Daily Editorial, Vol-2/No-166 (#voiceeditorial)

Credit - The Voice Weekly