NCCT ညီလာခံတွင် အဖွဲ့ဝင်မဟုတ်သည့် တိုင်းရင်းသား လက်နက်ကိုင်များကို ဖိတ်ကြားမည်

ရန်ကုန်၊မေ ၁၃။        ။ တစ်နိုင်ငံလုံး အပစ်အခတ် ရပ်စဲရေး ဆိုင်ရာ ညှိနှိုင်းရေးအဖွဲ့ (NCCT) ခေါင်းဆောင်များ၏ ညီလာခံကို မေလ အတွင်း ကျင်းပသွား မည်ဖြစ်ရာ အဆိုပါ ညီလာခံသို့ NCCT အဖွဲ့ဝင်မဟုတ်သည့်  တိုင်းရင်းသား လက်နက်ကိုင် အဖွဲ့များကိုပါ ဖိတ်ကြားသွားမည်ဟု NCCT အဖွဲ့ဝင် ပဒိုစောကွယ် ထူးဝင်းက မဇ္ဈိမကိုပြောသည်။

ညီလာခံကို KNU ထိန်းချုပ် နယ်မြေ အတွင်းရှိ လောခီးလာ ဒေသတွင် ကျင်းပရန် ဖြစ်နိုင်ချေ အများဆုံးရှိပြီး ညီလာခံကျင်းပမည့်ရက်ကို ညှိုနှိုင်းဆွေးနွေးနေ ဆဲဖြစ်သည်ဟု ၄င်းကဆိုသည်။

ပဒိုစောကွယ်ထူးဝင်းက” အစည်းအဝေးကို ဒီလမကုန်ခင်ကျင်းပဖို့မှန်းထားပါတယ်။ မကျင်းပဖြစ်ရင် ဇွန်လ ပထမပတ်မှာကျင်းပမှာပါ။ အပစ်အခတ်ရပ်စဲရေး ကို အဓိကထားဆွေးနွေးမယ်ဆိုတော့ NCCT အဖွဲ့ဝင် မဟုတ်တဲ့ တိုင်းရင်းသားအဖွဲ့တွေကိုလည်း ဖိတ်ကြားသွားမှာပါ။ တိုင်းရင်းသားနိုင်ငံရေးပါတီတွေတော့ ပါမှာမဟုတ်ဘူး”ဟုပြောသည်။

ညီလာခံတွင် တစ်နိုင်ငံလုံး အပစ်အခတ် ရပ်စဲရေး သဘောတူစာချုပ်မူကြမ်း (NCA) နှင့် ပတ်သက်၍  အဓိက ထား ဆွေးနွေးသွားမည်ဖြစ်ပြီး အဖွဲ့အသီးသီးမှ တင်ပြလာသည့်  NCA နှင့်ပတ်သက်သည့် အကြောင်း အရာများ ကို ဆွေးနွေးသွားမည်ဖြစ်သည်။

NCCT ညီလာခံတွင် ကိုးကန့်အဖွဲ့ ( မြန်မာအမျိုးသား ဒီမိုကရက်တစ် မဟာမိတ်တပ်မတော် -  MNDAA) ၊ ရက္ခိုင့်တပ်မတော်(AA)၊ တအောင်းတပ်မတော် (TNLA) တို့ တက်ရောက်လာပါက NCCT မှ နှုတ်ထွက် မည့်ကိစ္စကို တင်ပြလာနိုင်သည်ဟုလည်း ပဒိုစောကွယ်ထူးဝင်းကဆိုသည်။

ယင်းအဖွဲ့ သုံးဖွဲ့သည် ၀ပြည်သွေးစည်း ညီညွတ်ရေးတပ်မတော်၊ ပါတီ (UWSA ) ဌာနချုပ် ပန်ဆန်း ပြည်နယ် တွင်ကျင်းပသည့် ညီလာခံတွင် မေလ ၄ ရက် က  NCCT အဖွဲ့ဝင် အဖြစ်မှ နှုတ်ထွက်ခွင့်ပေးရန် တင်ပြခဲ့ခြင်းဖြစ်သည်။

ညီလာခံ တက်ရောက်ရန်နှင့်  ပတ်သက်ပြီး ရှမ်းပြည် ပြည်လည်ထူထောင်ရေး ကောင်စီ (RCSS/SSA) ဗိုလ်မှူးကြီးစိုင်းလှက “  ဖိတ်ကြားစာတော့ မရသေး ပါဘူး။ ရလာခဲ့ရင်လည်း ဗဟိုမှာ သုံးသပ်ပြီး တက်ဖို့ စဉ်းစားဖြစ်မယ်ထင်ပါတယ်။ NCA နဲ့ပတ်သက်ပြီး အခုထိတော့ ဆွေးနွေးထားမရှိသေးပါဘူး။ တာဝန်ရှိ သူတွေက လာပြီးရှင်းပြထားတာလည်းမရှိသေးပါဘူး”ဟုပြောသည်။

ရှမ်းပြည်ပြန်လည်ထူထောင်ရေးကောင်စီအနေဖြင့် လက်ရှိအချိန်တွင် တစ်နိုင်ငံလုံး အပစ်ရပ် သဘောတူစာချုပ်မူကြမ်း (NCA) နှင့်ပတ်သက်၍ သုံးသပ်မှု တစ်စုံတစ်ရာ မပြုလုပ်ရသေးဟုလည်းဆိုသည်။

မတ်လ ၃၁ ရက်တွင်   အစိုးရ၏ ငြိမ်းချမ်းရေးဖော်ဆောင်လုပ်ငန်းကော်မတီ (UPWC)နှင့် တစ်နိုင်ငံလုံး အပစ်အခတ် ရပ်စဲရေး ဆိုင်ရာ ညှိနှိုင်းရေးအဖွဲ့ (NCCT) တို့ကြား အပစ်ရပ်စာချုပ်မူကြမ်းကို နှစ်ဘက်သဘောတူ ညှိနှိုင်း ရေးဆွဲပြီးကြောင်း အတည်ပြုချက် လက်မှတ်ကို နိုင်ငံတော်သမ္မတ ဦးသိန်းစိန် ရှေ့မှောက်တွင် ရေးထိုး ခဲ့ပြီးဖြစ်သည်။


Credit - Mizzima News