အာရှဘောလုံးအဖွဲ့ချုပ်က ဦးဆောင်ကျင်းပမယ့် (၈) ကြိမ်မြောက်
အာရှချန်ပီယံ ယူ ၁၉ အမျိုးသမီး ဘောလုံးပြိုင်ပွဲ ခြေစစ်ပွဲ ယှဉ်ပြိုင်မယ့်
ပဏာမ ကစားသမားစာရင်းကို မြန်မာနိုင်ငံ ဘောလုံးအဖွဲ့ချုပ်က အောက်တိုဘာ ၂၇
ရက်နေ့မှာ ထုတ်ပြန်လိုက်ပါတယ်။ ဒီပြိုင်ပွဲအတွက် ပြည်ပအသင်းတွေနဲ့ ခြေစမ်း
ကစားထားတာ မရှိဘဲ ပြည်တွင်းမှာပဲ စခန်းသွင်း လေ့ကျင့်ထားပြီး ပြိုင်ဘက်
အသင်းတွေဟာ တောင့်တင်းတဲ့ အသင်းတွေ ဖြစ်တယ်လို့ မြန်မာယူ ၁၉
အသင်းနည်းပြချုပ် ဦးဝင်းမြင့်သွင်က ဆိုပါတယ်။ ဒါပေမဲ့လည်း ခြေစစ်ပွဲ
အောင်မြင်ဖို့တော့ ကြိုးစားသွားမှာပါလို့လည်း သူက ထပ်ဆင့်ပြောပါတယ်။
ခြေစစ်ပွဲကို ယှဉ်ပြိုင်မယ့် မြန်မာအသင်းဟာ စက်တင်ဘာ ၇ ရက်နေ့ကစပြီး သုဝဏ္ဍ
လေ့ကျင့်ရေးစခန်းမှာ ကစားသမား ၃၀ ဦးနဲ့ စခန်းသွင်း လေ့ကျင့်နေပြီး
မြန်မာ့လက်ရွေးစင် အမျိုးသမီးအသင်းနဲ့ ခြေစမ်းပွဲနှစ်ပွဲ ကစားခဲ့ရာ
နှစ်ပွဲလုံး ရှူံးပေမယ့် အားကစား ဝန်ကြီးဌာန အမျိုးသမီးအသင်းနဲ့
ခြေစမ်းကစားခဲ့တဲ့ နှစ်ပွဲစလုံး အနိုင်ရခဲ့တယ်လို့ မြန်မာယူ ၁၉ အမျိုးသမီး
လက်ထောက်နည်းပြ ဒေါ်ဇင်မာဝမ်းက ဆိုပါတယ်။
ထိုင်းနိုင်ငံ
ဘန်ကောက်မြို့မှာ ကျင်းပမယ့် ခြေစစ်ပွဲမှာ မြန်မာအသင်းက
အာရှအရှေ့ပိုင်းဇုန်မှာပါပြီး တရုတ် (တိုင်ပေ) အသင်းနဲ့ နိုဝင်ဘာ ၅ ရက်၊
ထိုင်းအသင်းနဲ့ နိုဝင်ဘာ ၉ ရက်နေ့တို့မှာ ယှဉ်ပြိုင်မှာဖြစ်ပြီး
သုံးသင်းထဲက အုပ်စုပထမရတဲ့ အသင်းပဲ ၂၀၁၅ ခုနှစ်မှာ ကျင်းပမယ့်
အာရှချန်ပီယံရှစ် ယူ ၁၉ အမျိုးသမီး ဘောလုံးပြိုင်ပွဲကို
ယှဉ်ပြိုင်ခွင့်ရမှာ ဖြစ်တယ်လို့ အာရှဘောလုံး အဖွဲ့ချုပ်က
ထုတ်ပြန်ထားပါတယ်။
မြန်မာသင်းဟာ အာရှချန်ပီယံရှစ် ယူ ၁၉
အမျိုးသမီးပြိုင်ပွဲကို ၂၀၀၂ ခုနှစ်၊ ၂၀၀၇ ခုနှစ်နဲ့ ၂၀၁၃ ခုနှစ်တို့မှာ
ပြိုင်ခဲ့ဖူးပေမယ့် အောင်မြင်မှုတော့ မရခဲ့ပေ။
Credit - The Voice Weekly
No comments:
Post a Comment