ရန်ကုန် (မဇ္ဈိမ) ။ ။ မွန်ပြည်နယ်၊ ရေးမြို့၊ အံဒင်ရွာအနီးတွင်
တည်ဆောက်မည့် ကျောက်မီးသွေးသုံး ဓာတ်အားပေးစက်ရုံစီမံကိန်းကို
မလိုလားသောကြောင့် ဒေသခံပြည်သူအင်အား ၆၀၀၀ ခန့်က မတ်လ (၅) ရက်တွင်
ဒုတိယအကြိမ်မြောက် ဆန္ဒဖော်ထုတ်ခဲ့ကြသည်။ Toyo Thai Group ကုမ္ပဏီက
တည်ဆောက်မည့် အဆိုပါ စီမံကိန်းအား ဆန္ဒဖော်ထုတ်မှုကို
အံဒင်ကျေးရွာဘောလုံးကွင်းတွင် ပြုလုပ်ခဲ့ခြင်းဖြစ်ပြီး
ဆန္ဒဖော်ထုတ်ခွင့်အတွက် လူအင်အား တစ်သောင်း ခွင့်ပြုမိန့်တင်ခဲ့သော်လည်း
မြို့နယ်ရဲတပ်ဖွဲ့မှူးက လူအင်အား ၆၀၀၀ ဖြင့်သာ ဆန္ဒဖော်ထုတ်ရန်
ခွင့်ပြုပေးခဲ့သည်။
ဆန္ဒထုတ်ဖော်ရာတွင် ကျောက်မီးသွေး စက်ရုံအလိုမရှိ၊ စီမံကိန်း ရုပ်သိမ်းရေး၊ ရေး ဒေသ အလှကာကွယ်ရေး၊ Toyo Thai ကုမ္ပဏီ အလိုမရှိ၊ ရေးဒေသအလှ မပျက်စီးရေး စသည့် အချက်(၅)ချက် ဖြင့် ဆန္ဒထုတ်ဖော်ခဲ့ခြင်းဖြစ်သည်။
"တကယ်လို့ ဒီစီမံကိန်း လုပ်မယ်ဆိုရင် ကျေးရွာအတွက် မီးရမှာတစ်ခုတည်း၊ နောက်ဆိုးကျိုးတွေကများတယ်၊ တကယ်လို့ စက်ရုံသာတည်ဆောက်ရင် မရရတဲ့ နည်းနဲ့ ကျွန်တော်တို့ ထပ်ကန့်ကွက်သွားမယ်"ဟု ရေးမြို့နယ် လူမှုအကျိုးဆောင်ဖွဲ့ (YSS)မှ အတွင်းရေးမှူး ဒေါက်တာ အောင်နိုင်ဝင်းက မဇ္ဈိမသို့ ပြောသည်။
၁၂၈၀ မဂ္ဂါဝပ်ထုတ်လုပ်မည့် ယင်းကျောက်မီးသွေးစက်ရုံ စီမံကိန်းကို Toyo Thai Group ကုမ္ပဏီက ၂၀၁၃ ခုနှစ်၊ မတ်လ ၂၃ ရက်တွင်လျှပ်စစ် စွမ်းအင်ဝန်ကြီး ဌာန နှင့် နားလည်မှု စာချွန်လွှာ လက်မှတ်ရေးထိုးခဲ့ပြီးနောက် ၂၀၁၅ ခုနှစ် ဧပြီ ၉ရက်တွင် စီမံကိန်းအား ဆောင်ရွက်ရန် သဘောတူ စာချုပ်ချုပ်ဆိုလိုက်ခြင်းကြောင့် ဆန္ဒထုတ်ဖော်ရခြင်းဖြစ်သည် ဟု၎င်းကပြောသည်။
စီမံကိန်းဆောင်ရွက်မည့် မြေဧက ၅၀၀ အတွင်း ကျေးရွာပေါင်း ၆၀၀ အထိ ရှိနေပြီး စီမံကိန်းတည်ဆောက်မှုကြောင့် သဘာဝပတ်ဝန်းကျင်ထိခိုက်မှု၊ ဒေသခံများ ထိခိုက်နစ်နာမှုများ ရှိလာနိုင်သည်ဟု သဘာဝ ပတ်ဝန်းကျင်ထိန်းသိမ်းရေးပညာရှင် ဒေါ်ဒေ၀ီသန့်စင်က မဇ္ဈိမသို့ပြောသည်။
"ခုအစိုးရက ကြာဇံစက်ရုံ ၊ဘီယာစက်ရုံကထွက်တဲ့ အပုပ်နံ့ကိုတောင်မထိန်းသိမ်းနိုင်ပဲနဲ့ ကျောက်မီးသွေးစက်ရုံဆိုတော့ ပိုဆိုးတာပေါ့ ။ကျောက်မီးသွေးစက်ရုံက စွန့်ပစ် ပစ္စည်းတွေက အကုန်အဆိပ်တွေ ကြီးပဲ၊ဒေါ်လေးတို့က တော့ကန့်ကွက်တယ်"ဟု ၎င်းကပြောသည်။
ပညာရှင်များ၏ အကူအညီဖြင့် ခန့်မှန်းတွက်ချက်ပြီး YSS မှ ဖြန့်ဝေသည့် လက်ကမ်းစာစောင်တွင် ၁,၂၈၀ မဂ္ဂါဝပ်ထုတ်မည့် ကျောက်မီးသွေးစက်ရုံအတွက် တစ်နေ့ လျှင်ကျောက်မီးသွေး တန်ချိန် (၁၂,၀၀၀) ကို မီးရှို့ အသုံးပြုရမည် ဖြစ်ပြီး၊ စက်ရုံ အအေးခံရန်အတွက် တစ်နေ့လျှင် ရေပီပါပေါင်း နှစ်သန်းတစ်သိန်းကျော် အသုံးပြုကာ၊ မူလရေထက် ၁၀ ဒီဂရီ စင်တီဂရိတ် ပူမည့် ရေကို ပင်လယ်ထဲသို့ စွန့်ပစ်ရမည်ဟု ဖော်ပြထားသည်။
အဆိုပါ စီမံကိန်းအတွက် အမေရိကန်ဒေါ်လာ ၂ ဒသမ ၇ ဘီလီယံ မြှပ်နှံမည့် Toyo Thai Group ကုမ္ပဏီကလည်း ဒေသခံများ ဆန္ဒထုတ်ဖော်နေချိန်တွင် အခြားဒေသခံများ၊ မီဒီယာများ၊ လွှတ်တော်ကိုယ်စားလှယ်များ၊ ပညာရှင်များကို ဖိတ်ခေါ်ပြီး ထိုင်းနှင့် ဂျပန်နိုင်ငံရှိ ကျောက်မီးသွေး စက်ရုံများသို့ လေ့လာရေးခရီး စီစဉ်ပေးခဲ့သည်။
Credit - Mizzima News
No comments:
Post a Comment