 |
| ရခိုင်ပြည်နယ်မှ ပြန်လွှတ်လိုက်သည့် ဘင်္ဂလားဒေ့ရ်ှနိုင်ငံသားဟုဆိုသူများ လှေများဖြင့် ထွက်ခွာစဉ်။ (ဓာတ်ပုံ-အီးပီအေ) |
ရန်ကုန် (မဇ္ဈိမ) ။ ။ ရခိုင်ကမ်းရိုးတန်းသို့ ၀င်ရောက်လာသော လှေစီးဒုက္ခသည် ၁၁ ဦးကို ရခိုင်ပြည်နယ် အစိုးရက ပင်လယ်ပြင်အတွင်းသို့ ပြန်လွှတ်လိုက်သည် ဟု ရခိုင်ပြည်နယ် အစိုးရအဖွဲ့က သတင်းထုတ်ပြန်လိုက်သည်။
မေလ ၁၇ ရက်က မောင်တောမြို့နယ် ဥဒေါင်း(အနောက်)ရွာ အနီးရှိ ကံပူးချောင်းပုစွန်ကန် တဲအတွင်းတွင်လှေစီး ဒုက္ခသည်များ ရောက်ရှိနေသည့် သတင်းပေးပို့ချက်များအရ သွားရောက်စိစစ်ခဲ့ပြီး ဘင်္ဂလားဒေ့ရ်ှနိုင်ငံသား ဆယ့်တစ်ဦးကိုတွေ့ရှိခဲ့သည် ဟုဆိုသည်။
"စစ်ဆေးတွေ့တဲ့ အထောက်အထားတွေ အရ သူတို့နေရပ်ကို သူတို့ပြန်ဖို့ ပြန်လွှတ်လိုက်တာပါ၊ နယ်ခြားစောင့်တပ်ဖွဲ့ နဲ့ လ.၀.က က ၀န်ကြီးချုပ်ရဲ့ ညွှန်ကြားချက်အရ ပြန်လွှတ်လိုက်တာ ဖြစ်ပါတယ်"ပြည်နယ် လ.၀.က ဦးစီးမှူး ဦးခင်စိုးကပြောသည်။
လူကုန်ကူးမှု တိုက်ဖျက်ရေး အဖွဲ့ ရခိုင်ပြည်နယ်တာဝန်ခံ ဒုရဲမှူး ကျော်ညွှန့်က ထို၁၁ဦးမှာ ဘင်္ဂလားဒေ့ရ်ှနိုင်ငံ စစ်တကောင်းနှင့် ဒါကာ မြို့များမှ ဖြစ်သည်ဟု ဆိုသည်။
ဘင်္ဂလားဒေ့ရ်ှနိုင်ငံ ကော့ဘဇားမြို့ ဆိပ်ကမ်းမှ မလေးရှားနိုင်ငံသို့ ထွက်ခွာရန် လိုက်ပါလာခဲ့ခြင်းဖြစ်ပြီး ထိုဆိပ်ကမ်းမှ မလေးရှားနိုင်ငံသို့ သွားရောက်ရန် အဆင်မပြေတော့သဖြင့် နေရပ်သို့ ပြန်ပို့မည် ဟု ပြောကာ ပြန်လွှတ်ခဲ့ခြင်းဖြစ်သည် ဟု ထွက်ဆိုခဲ့ကြောင်း ဒုရဲမှူး ကျော်ညွှန့်ကပြောသည်။
ထိုစက်လှေမှာ မောင်တောခရိုင် အလယ်သံကျော်ချောင်းဝအနီး ပင်လယ်ရေအနက် (၇)ပေ ခန့်သို့ရောက်ရှိစဉ် ခုန်ဆင်းရာမှ မောင်တော ခရိုင်အတွင်းသို့ရောက်ရှိလာသည် ဟုဆိုသည်။
"သူတို့ လိပ်စာတွေ အထောက်အထားတွေပါတဲ့အတွက် သူတို့ လာတဲ့လမ်းအတိုင်း ပြန်လွှတ်လိုက်တာ။ သူတို့ ရဲ့ ထွက်ဆိုမှုအရလည်း သူတို့ ဟာ ဘင်္ဂလားဒေရ်ှနိုင်ငံက ဆိုတာပေါ်ပေါက်ပါတယ်။"ဟု ဒုရဲမှူး ကျော်ညွှန့်ကပြောသည်။
ရခိုင်ပြည်နယ် တွင်းနေထိုင်သော ဘင်္ဂလီလူမျိုးစု များမှာ နေရပ် စွန့်ခွာကာ ပြည်ပနိုင်ငံများသို့ရေကြောင်းမှ တဆင့် ထွက်ခွာမှုများလည်း ရှိနေသည်။
မြန်မာနှင့် ဘင်္ဂလားဒေ့ရ်ှနိုင်ငံများမှ မလေးရှား၊ ထိုင်းနိုင်ငံများသို့ လှေစီးကာသွားလာနေကြသော ရွှေ့ပြောင်း အခြေချ ဒုက္ခသည်များနှင့် ပတ်သက်ပြီး မြန်မာအစိုးရအနေဖြင့် တာဝန်ယူနိုင်မည် မဟုတ်ဟု ငြင်းဆိုထားသည်။
Credit - Mizzima News
No comments:
Post a Comment