ရွေးကောက်ပွဲမှာ အနုပညာရှင်တွေပါဝင်ရေး ကော်မရှင်ဆွေးနွေး

ပြည်ထောင်စု ရွေးကောက်ပွဲကော်မရှင် ဥက္ကဌ ဦးတင်အေးက အရပ်ဘက်လူမှုအဖွဲ့အစည်းတွေ၊ အနုပညာရှင်တွေကို ရန်ကုန်မြို့မီကာဆာဟိုတယ်မှာ ဒီကနေ့ တွေ့ဆုံပြီး ၂ဝ၁၅ ရွေးကောက်ပွဲအတွက် ပူးပေါင်းပါဝင်ကြဖို့ တိုက်တွန်းခဲ့ပါတယ်။ လာမယ့် ၂ဝ၁၅ ရွေးကောက်ပွဲအတွက် မဲပေးခွင့်ရှိသူစာရင်းတွေကို အရပ်ဘက်အဖွဲ့အစည်းတွေနဲ့ ပူးပေါင်းကောက်ယူနိုင်ဖို့နဲ့ အသိပညာပေးလုပ်ငန်းတွေမှာ အနုပညာရှင်တွေ ပါဝင်လုပ်ဆောင်ဖို့ ဆွေးနွေးခဲ့တာဖြစ်တယ်လို့ ရွေးကောက်ပွဲကော်မရှင် ညွှန်ကြားရေးမှူး ဦးလှမောင်ချိုက ပြောပါတယ်။


"အရပ်ဘက်လူမှုအဖွဲ့အစည်းတွေနဲ့ တွေ့ဆုံတယ်ဆိုတာ အခြေခံမဲဆန္ဒရှင်စာရင်း တစ်ပြည်လုံးအတိုင်းအတာနဲ့ ဆောင်ရွက်နေတာရှိပါတယ်၊ အဲ့ဒါမှာ အရပ်ဘက်လူမှုအဖွဲ့အစည်းတွေ အကူအညီကိုရယူပြီးတော့ မှန်ကန်တိကျတဲ့ မဲစာရင်းထွက်ရှိဖို့အတွက် ကျနော်တို့ ပူးပေါင်းဆောင်ရွက်တာဖြစ်ပါတယ်၊ နောက်တစ်ခုက အနုပညာရှင်နဲ့ ပတ်သက်လို့ မဲဆန္ဒရှင်တွေ ပညာပေးလုပ်ငန်းစဉ်တွေမှာ အနုပညာရှင်တွေနဲ့ ပူးပေါင်းပြီးတော့ ကျနော်တို့ကော်မရှင်နဲ့ ပြန်ကြားရေးဝန်ကြီးဌာနနဲ့ စုပေါင်းပြီးတော့ အသိပညာပေးတဲ့လုပ်ငန်းတွေ ဆောင်ရွက်ဖို့အတွက် ကျနော်တို့ တွေ့ဆုံတာဖြစ်ပါတယ်"

ပြည်ထောင်စု ရွေးကောက်ပွဲ ကော်မရှင်အနေနဲ့ အနုပညာရှင်တွေကို ပထမဆုံးအကြိမ် တွေ့ဆုံတာဖြစ်ပြီး အရပ်ဖက်လူမှုအဖွဲ့အစည်းတွေနဲ့ တွေ့ဆုံတာကတော့ လေးကြိမ်ရှိပါပြီ။ ရွေးကောက်ပွဲ အသိပညာပေးသီချင်းတွေ၊ ဇာတ်လမ်းတွေ ရိုက်ကူးထုတ်လွှင့်နိုင်ရေးအတွက် လာမယ့်ဇန်န၀ါရီလမှာ ရွေးကောက်ပွဲကော်မရှင်နဲ့ အနုပညာရှင်တွေ ထပ်မံတွေ့ဆုံဆွေးနွေးမယ်လို့လည်း သိရပါတယ်။

Credit - RFA Burmese