ပြည်ထောင်စု
ကြံ့ခိုင်ရေးနဲ့ ဖွံ့ဖြိုးရေးပါတီအနေနဲ့ ခြောက်ပွင့်ဆိုင်
တွေ့ဆုံဆွေးနွေးရေးကိုသာ လက်ခံလိုက်နာကြဖို့ ပါတီဝင်တွေကို
ညွှန်ကြားထားကြောင်း ပါတီရဲ့ပြောရေးဆိုခွင့်ရှိသူ ဦးအောင်သိန်းလင်းက ပြောပါတယ်။
ခြောက်ပွင့်ဆိုင် တွေ့ဆုံဆွေးနွေးရေးဟာ ပါတီမူဝါဒနဲ့အညီ အမျိုးသားအကျိုးစီးပွားကို အခြေခံတာမို့ အခုလို ညွှန်ကြားရတာဖြစ်ကြောင်း ပြည်ခိုင်ဖြိုးပါတီပြောခွင့်ရပုဂ္ဂိုလ် ပြည်သူ့လွှတ်တော်ကိုယ်စားလှယ် ဦးအောင်သိန်းလင်းက အာအက်ဖ်အေက မေးမြန်းစဉ် ဒီကနေ့ ပြောကြားလိုက်တာပါ။
"၆ ပွင့်ဆိုင်ဆွေးနွေးရေးဆိုတာကလည်း
လွှတ်တော်ထဲမှာ ကျနော်တို့ပါတီက အဆိုတင်သွင်းပြီးတော့မှ
အဲဒီ့အဆိုကအောင်သွားတယ်၊ အဲ့တော့ ကျနော်တို့ပါတီရဲ့မူဝါဒက
အမျိုးသားအကျိုးစီးပွားအပေါ်မှာ
အခြေခံတဲ့မူဝါဒဖြစ်ပါတယ်၊ တစ်မျိုးသားလုံး အကျိုးရှိမယ့်ကိစ္စဆိုရင်
ကျနော်တို့က ရပ်တည်တာပေါ့ဗျာ၊ ဖွဲ့စည်းပုံအခြေခံဥပဒေနဲ့ ပတ်သက်လို့ကလည်း
အချိန်အခါအခြေအနေပေါ် မူတည်ပြီးတော့မှ ပြုပြင်ပြောင်းလဲသင့်တဲ့ဟာတွေကို ပြုပြင်ကြမယ်ဆိုတာကို ကျနော်တို့ပါတီက ရပ်တည်ထားတယ်"
အဲဒီညွှန်ကြားစာကို အခုလ ၁၃ ရက်နေ့နေ့စွဲနဲ့ ပေးပို့ခဲ့တာလို့ သိရပါတယ်။
ပြီးခဲ့တဲ့ ၁၁ ကြိမ်မြောက် ပြည်ထောင်စုလွှတ်တော် အစည်းအဝေးမှာ
ဖွဲ့စည်းပုံအခြေခံဥပဒေ ပြင်ဆင်နိုင်ဖို့အတွက် နိုင်ငံတော်သမ္မတ၊
ကာကွယ်ရေးဦးစီးချုပ်၊ လွှတ်တော်ဥက္ကဌ နှစ်ဦး၊ ဒေါ်အောင်ဆန်းစုကြည်နဲ့
တိုင်းရင်းသား လွှတ်တော်ကိုယ်စားလှယ်တစ်ဦးတို့
ပါဝင်တဲ့ ခြောက်ပွင့်ဆိုင် တွေ့ဆုံဆွေးနွေးရေးဆိုပြီး ပြည်ခိုင်ဖြိုးပါတီက
အဆိုတင်သွင်းခဲ့ရာမှာ အတည်ဖြစ်ခဲ့ပြီး ပြည်ထောင်စုအစိုးရထံ တင်ပြထားပါတယ်။
ပြီးခဲ့တဲ့ ရက်ပိုင်းကတော့ ရန်ကုန်တိုင်းနဲ့ စစ်ကိုင်းတိုင်းဒေသကြီး
လွှတ်တော်မှာ ၁၂ ပွင့်ဆိုင် တွေ့ဆုံဆွေးနွေးဖို့ ပြည်ထောင်စုအစိုးရကို
တိုက်တွန်းကြောင်းအဆိုကို တင်သွင်းခဲ့ကြပါတယ်။
Credit - RFA Burmese
No comments:
Post a Comment