ချင်းမိုင်၊ မေ ၂၆ ။ ။ တစ်နိုင်ငံလုံး အပစ်အခတ် ရပ်စဲရေး ညှိနှိုင်းရေးအဖွဲ့ (NCCT)၏ ဒုတိယနေ့ အစည်းအဝေးတွင် တိုင်းရင်းသား လက်နက်ကိုင် အဖွဲ့အစည်း များ၏ အကြံပြုချက်များကို ပြန်လည် သုံးသပ်ခဲ့ကြသည်ဟု NCCT ၏ ဒုတိယခေါင်းဆောင် ပဒိုကွယ်ထူးဝင်းက ပြောသည်။
NCCT အဖွဲ့တွင် ပါဝင်သော တိုင်းရင်းသားလက်နက်ကိုင် အဖွဲ့အစည်း ၁၆ ဖွဲ့၏ တစ်နိုင်ငံလုံး အပစ်အခတ် ရပ်စဲရေးမူကြမ်း (NCA ) အပေါ် အကြံပြုချက်များကို NCCT ခေါင်းဆောင်များက စုစည်း၍ ပြန်လည် သုံးသပ်ဆွေးနွေးနေခြင်း ဖြစ်သည်။
“ဒီနေ့က NCCT ရဲ့ ရှေ့လုပ်ငန်းစဉ်အတွက် လော်ခီးလာ အစည်းအဝေးမှာ သူတို့ တင်ပြမယ့် အချက်တွေကို ဆွေးနွေးတယ်။ ကျွန်တော်တို့ တိုင်းရင်းသား အဖွဲ့ အစည်းတွေက အဖွဲ့အစည်းခေါင်းဆောင်တွေရဲ့ အဆိုပြုတာ အကြံပြုချက်တွေကို ပြန်လည် စုစည်းတဲ့သဘောပါ”ဟု ပဒိုကွယ်ထူးဝင်းက မဇ္ဈိမကို ပြောသည်။
တိုင်းရင်းသား လက်နက်ကိုင် အဖွဲ့အစည်းများ၏ အကြံပြုချက်၊ အဆိုပြုချက်များကို သုံးသပ်၍ လာမည့် ဇွန်လ ၂ ရက်မှ ၆ ရက်ထိ ကျင်းပမည့် လော်ခီးလာ အစည်းအဝေးတွင် ပြန်လည် တင်ပြမည် ဖြစ်ကြောင်း ၎င်းက ပြောသည်။
ပြီးခဲ့သည့် မတ်လ ၃၁ ရက်က NCCT နှင့် အစိုးရတို့အကြား တစ်နိုင်ငံလုံး အပစ်အခတ် ရပ်စဲရေး မူကြမ်းပါအချက်များ သဘောတူညီမှု ရရှိခဲ့မှုအပေါ် သက်ဆိုင်ရာ တိုင်းရင်းသား လက်နက်ကိုင် အဖွဲ့အစည်းများထံ ပြန်လည်တင်ပြကာ တိုင်းရင်းသားခေါင်းဆောင်များ၏ အကြံပြုချက်များ ရယူခဲ့ခြင်း ဖြစ်သည်။
တိုင်းရင်းသား လက်နက်ကိုင် အဖွဲ့အစည်းများ ကျင်းပမည့် လော်ခီးလာအစည်းအဝေးအတွက် အကြို ညှိနှိုင်းသော အစည်းအဝေးကို မေလ ၂၅ ရက်မှစတင်၍ ထိုင်းနိုင်ငံ ချင်းမိုင်မြို့တွင် ကျင်းပခဲ့ရာ အစိုးရ နှင့် တိုင်းရင်းသား လက်နက်ကိုင် အဖွဲ့အစည်းများ တစ်နိုင်ငံလုံး အပစ်အခတ် ရပ်စဲရေး လက်မှတ်ရေး ထိုးပြီးနောက် နိုင်ငံရေးဆွေးနွေးပွဲ ပြုလုပ်ရန်အတွက် မူဘောင်ကို NCCT ၏ မူဘောင်ရေးဆွဲရေး လုပ်ငန်းအဖွဲ့ဝင်များက ကြိုတင် ညှိနှိုင်းဆွေးနွေးခဲ့သည်။
ဒုတိယနေ့ NCCT အစည်းအဝေးတွင် ခေါင်းဆောင် နိုင်ဟံသာ၊ ဒုတိယခေါင်းဆောင် ပဒိုကွယ်ထူးဝင်းတို့ အပါအဝင် အဖွဲ့ဝင်များ တက်ရောက်ခဲ့သော်လည်း NCCT ၏ ဒုတိယခေါင်းဆောင် ဗိုလ်ချုပ် ဂွမ်မော်က ခရီးလွန်နေသဖြင့် တက်ရောက်လာခြင်း မရှိသေးပေ။
Credit - Mizzima News
No comments:
Post a Comment