မြန်မာများအတွက် မြန်မာ့နှစ်သစ်ကူး နှစ်ဆန်းတစ်ရက်သည် ကမ္ဘာလုံးပြက္ခဒိန် ဧပြီလလယ်တွင် ကျရောက်သည်။ သင်္ကြန်ကာလ လည်းဖြစ်ပြီး နှစ်ဟောင်းမှ အညစ်အကြေးများကို အတာရေဖြင့် ဆေးကြောသည်ဟု အယူရှိသည်။ သင်္ကြန်ရေပွဲသဘင် ဆင်ယင်ကြသည်။ ဇန်န၀ါရီ ၁ သည်ကား တကမ္ဘာလုံးအတွက် နှစ်ဆန်းတစ်ရက်ဖြစ်သည်။ နိုင်ငံတကာအသိုင်းအ၀ိုင်းတွင် ယခင်ကထက် ထဲထဲဝင်ဝင် ၀င်ဆံ့လာသော မြန်မာနိုင်ငံအတွက် ကမ္ဘာ့ပြက္ခဒိန်၏ နှစ်ဆန်းတစ်ရက်သည် ပို၍ အဓိပ္ပာယ်ရှိလာခဲ့သည်။
၂၀၁၅ နှစ်သစ်သည် မြန်မာ တစ်မျိုးသားလုံးအတွက် အပြောင်းအလဲ ဖြစ်နိုင်ကောင်းသည့် နှစ်တစ်နှစ်အဖြစ် နိုင်ငံရေးသမား များ၊ နိုင်ငံတည်ဆောက်ရေးသမားများနှင့် စီးပွားရေးသမားများက ယူဆကြသည်။ တိုင်းပြည်၏ အပြောင်းအလဲကို ဖော်ဆောင်ပေးနိုင်မည့် ငြိမ်းချမ်းရေးကိစ္စများ၊ ဒီမိုကရေစီရေး လူ့အခွင့်အရေးနှင့် နိုင်ငံသား အခွင့်အရေးများနှင့် အလှမ်းဝေးသည့် ၂၀၀၈ အခြေခံ ဥပဒေကို ပြင်ဆင်ရေးကိစ္စများ၊ ၂၀၁၅ အထွေထွေရွေးကောက်ပွဲကို အချိန်မှန် မှန်ကန် မျှတ ပွင့်လင်းစွာ ကျင်းပရေးကိစ္စများ စသည်ဖြင့် အခွင့်အရေးကောင်းများ ၂၀၁၅ တွင် ရှိနေသည်။ အခွင့်အရေးကောင်းများဟု ယူဆနိုင်သလို စိန်ခေါ်မှုများ ဖြစ်သည်ဟု လည်း ပြောနိုင်ပါသည်။
မဇ္ဈိမက အကြိမ်ကြိမ် အခါခါ ပြောကြားခဲ့သည့်အတိုင်း တိုင်းပြည်နှင့်လူထုမျက်နှာကို ကြည့်သည့် ပြည်သူ့အစိုးရမှန်လျှင် ပြည်သူ လိုလားသည်များကို ဖြစ်မြောက်အောင် အကောင်အထည်ဖော်ရန် တာဝန်ရှိသည်။ တာဝန်ကို မခံလျှင် မသိလျှင် မယူလျှင် တာဝန်မကျေသည့် အစိုးရသာ ဖြစ်လိမ့်မည်။ ပြည်သူလိုလားသည့် တောင့်တသည့် တိုင်းပြည်၏ ကောင်းကျိုးကို ဖော်ဆောင်နိုင်မည့် အထက်ပါကိစ္စများကို တွေ့ဆုံခြင်း၊ ဆွေးနွေးခြင်း၊ ညှိနှိုင်းခြင်း၊ တိုင်ပင်ခြင်း၊ နားထောင်ခြင်း၊ သဘောတူခြင်းတို့ဖြင့်သာ ဖော်ဆောင်နိုင်ပါ သည်။ ဤသို့ဖြင့် အပွင့်ဆိုင်ဆွေးနွေးပွဲများသည် စတင်ရန်လည်း လိုပါသည်၊ အောင်မြင်အောင်လည်း ဆောင်ရွက်ကြရမည်ဖြစ်ပါသည်။
အစိုးရ၊ လွှတ်တော်၊ တရားစီရင်ရေးအဖွဲ့၊ တပ်မတော်၊ တိုင်းရင်းသားလက်နက်ကိုင်များ၊ နိုင်ငံရေးပါတီများ၊ အရပ်ဘက်အဖွဲ့အစည်းများ၊ လူမှုရေးအဖွဲ့အစည်းများ၊ အလုပ်သမားနှင့် လယ်သမားများ၊ ကျောင်းသားများ၊ ပညာရှင်များ၊ ကျွမ်းကျင်သူများ၊ မီဒီယာများ စသည်တို့ ပါဝင်သည့် နိုင်ငံ့မဏ္ဍိုင်များ၊ ဒေါက်တိုင်များ ခိုင်မာရန်နှင့် မိမိတို့ မဖြစ်မနေ လုပ်ဆောင်ရမည့် ကိစ္စများကို အချိန်မဆိုင်းဘဲ ပြီးဆုံးသည်အထိ တာဝန်ကျေပွန်အောင် လုပ်ဆောင်ကြရန်မှာ အင်မတိအင်မတန် အရေးကြီးပါသည်။
နိုင်ငံတည်ဆောက်ရေးမှာ အပြောလွယ် အလုပ်ခက်ပါသည်။ ပြည်သူတစ်ဦးချင်းစီက အားကြိုးမာန်တက် ပူးပေါင်းပါဝင် လုပ်ဆောင်ကြမှသာ ရည်မှန်းချက်ပန်းတိုင်ကို အရောက်သွားနိုင်ကြမည်ဖြစ်သည်။ ခေါင်းဆောင်နှင့်ပြည်သား တသားတည်းဖြစ်ရန်မှာ နိုင်ငံတည်ဆောက်ရေး ၏ အောင်မြင်မှုသော့ချက်ဖြစ်ပါသည်။ ခေါင်းဆောင်သည် ပြည်သူ့ဆန္ဒကို နားလည်ရပါမည်၊ ပြည်သူ့အသံကို နားထောင်ရပါမည်၊ ပြည်သူ့ လိုအင်ကို ဖြည့်စွမ်းရပါမည်။ အလားတူ နောက်လိုက်သည်လည်း မိမိတို့ ကျရာတာဝန်ကို ထမ်းဆောင်ရပါမည်၊ လိုက်နာရပါမည်၊ ပံ့ပိုး ကူညီ ပူးပေါင်း ဆောင်ရွက်ရပါမည်။ ခေါင်းဆောင်နှင့် နောက်လိုက်ညီသော အဖွဲ့အစည်း၊ အသင်းအပင်း၊ အရပ်ဌာနမှသည် တိုင်းနိုင်ငံ အထိ အောင်မြင်သည်ချည်းသာ ဖြစ်ပါသည်။
မြန်သော မာသော တိုင်းရင်းသားများ နေထိုင်ရာ မြန်မာနိုင်ငံသည် သယံဇာတ သဘာဝ အရင်းအမြစ်များ ပေါကြွယ်ဝပါသည်၊ ကမ္ဘာ့မြေမျက်နှာသွင်ပြင်တွင် မဟာဗျူဟာကျသော အရပ်ဒေသတွင် တည်ရှိပါသည်။ နိုင်ငံသားအများစုသည် ပျိုရွယ်တက်ကြွပြီး အစွမ်းအစများ ရှိကြပါသည်။ အခြေအနေကောင်းများ ပိုင်ဆိုင်ထားသော မြန်မာသည် ကမ္ဘာ့အလယ်တွင် ၀င့်ထည်နိုင်ကောင်းသည့် တိုင်းပြည်မျိုး ဖြစ်ပါသည်။ ကမ္ဘာလုံးဆိုင်ရာ လူ့အခွင့်အရေးများကို ခံစားနိုင်ခွင့် အပြည့်ရှိသော မြန်မာသည် အဘယ့်ကြောင့် နောက် ကျနေသနည်း၊ အောက်ကျနေရသနည်း။ အဖြေသည် မရှိတော့ပြီလော။
မဇ္ဈိမတွင် အဖြေရှိပါသည်၊ မဇ္ဈိမသည် အဖြေတွေ့ပါသည်။ သမ္မတဦးသိန်းစိန် ဦးဆောင်သော အဆင့်ဆင့်သော အစိုးရများသည် လည်းကောင်း၊ သူရဦးရွှေမန်း ဦးဆောင်သော အရပ်ရပ်သော လွှတ်တော်များသည် လည်းကောင်း၊ ဗိုလ်ချူပ်မှူးကြီး မင်းအောင်လှိုင် ဦးဆောင်သော တပ်မတော်သည် လည်းကောင်း၊ ဒေါ်အောင်ဆန်းစုကြည် ဦးဆောင်သော တိုင်းသိပြည်သိ နိုင်ငံရေးသမားများသည် လည်းကောင်း၊ ပင်လုံစိတ်ထားဖြင့် ကိုယ်ပိုင်ပြဋ္ဌာန်းခွင့်နှင့် တန်းတူညီမျှခွင့်ကို ဆောင်လိုသူ ညီနောင် တိုင်းရင်းသားခေါင်းဆောင် အပေါင်းတို့သည် လည်းကောင်း စသည့် အစုစု အစုံစုံသော ခေါင်းဆောင်နေရာ ယူထားသူတို့က ပြည်သူကို မျက်နှာမူ၍ တိုင်းပြည်၏ အနာဂတ်ရေး တွေးကာ တွေ့ဆုံခြင်း၊ ဆွေးနွေးခြင်း၊ အဖြေရှာခြင်းဖြင့် ခေါင်းဆောင်ကောင်းများ ပီသကြခြင်းသည်တစ်ကြောင်း၊ ပညာတတ်/ ပညာရှင်၊ လူသာမန်/ အရပ်သား၊ ကုန်သည်စီးပွား/ မီဒီယာပါမကျန် အခြေခြေ အရပ်ရပ် အနယ်နယ် အသွယ်သွယ်သော နိုင်ငံသား တစ်ဦးချင်းစီတိုင်းက မိမိကျရာ ရောက်ရာနေရာများမှ မိမိတာဝန်၊ အရပ်တာဝန်၊ အဖွဲ့တာဝန်၊ အသင်းတာဝန်၊ တိုင်းနိုင်ငံတာဝန် များကို ကျေပွန်စွာ ထမ်းဆောင်ကြခြင်းသည် တစ်ကြောင်း၊ ဤအကြောင်းနှစ်ပါး ပေါင်းစုံ၍ ဟန်ချက်ညီ ရုန်းနိုင်ကြလျှင် ပြည်မြန်မာသည် ၂၀၁၅ နှစ်သစ်ရာသီတွင် ကမ္ဘာဆီ ၀င့်ထည်တန်းနိုင်မည်ဟု မဇ္ဈိမပီပီ မှန်သည်ကို ယုံကြည်ကြောင်းပါ။
Credit - Mizzima News
No comments:
Post a Comment