သမ္မတခန့်အပ်ထားသော ရွေးကောက်ပွဲကော်မရှင်အား အယုံအကြည်မရှိကြောင်း ညီနောင်တိုင်းရင်းသားပါတီများ ဖက်ဒရေးရှင်း ပြောကြား
သမ္မတခန့်အပ်ထားသော ပြည်ထောင်စုရွေးကောက်ပွဲ ကော်မရှင်အား အယုံအကြည်မရှိကြောင်း ညီနောင်တိုင်းရင်းသားပါတီများ ပြောရေးဆိုခွင့်ရှိသူ ဦးစောသန်းမြင့်က ဇူလိုင် ၁၈ ရက်ကပြုလုပ်သော (၁၉) ကြိမ်မြောက် ညီနောင်တိုင်းရင်းသားပါတီများ ဖက်ဒရေးရှင်း ပုံမှန်အစည်းအဝေးပွဲအပြီးတွင် သတင်းထောက်များ၏ မေးမြန်းချက်ကို ပြောကြားသည်။
“အမှန်အတိုင်းပြောရရင် ရွေးကောက်ပွဲကော်မရှင်ကို အယုံအကြည်မရှိဘူး။ လက်ရှိကော်မရှင်ကို လုံးဝယုံကြည်မှုမရှိဘူး။ ရာခိုင်နှုန်း ၁ဝဝ ကို ယုံကြည်မှုမရှိဘူး။ ရာနှုန်းပြည့် ယုံကြည်မှုရှိအောင် ယုံကြည်လေးစားလောက်ရတဲ့ ပုဂ္ဂိုလ်ကြီးတွေ၊ တိုင်းရင်းသားဘက်က ပုဂ္ဂိုလ်ကြီးတွေလည်း ပါစေချင်တယ်။ အမှန်ပြောရရင် တစ်ဖက်သတ်ဖွဲ့စည်းထားတဲ့ ကော်မရှင်ဖြစ်ပါတယ်” ဟု ဦး စောသန်းမြင့်က ပြောကြားသည်။
ဇူလိုင် ၁၇၊ ၁၈ ရက် နှစ်ရက်ကြာ ပြုလုပ်သည့် (၁၉)ကြိမ်မြောက် ညီနောင်တိုင်းရင်းသားပါတီများ ဖက်ဒရေးရှင်း၏ အစည်းအဝေးတွင် ပြည်ထောင်စု ရွေးကောက်ပွဲကော်မရှင်၏ ညွှန်ကြားချက်အမှတ် ၁/၂ဝ၁၄ အား တိုင်းရင်းသားပါတီများ၏ ဆန္ဒနှင့်အညီ ပြန်လည်သုံးသပ်ပြင်ဆင်ပေးရန်နှင့် ပြည်သူအများ ယုံကြည်လေးစားသော ပုဂ္ဂိုလ်များဖြင့် ရွေးကောက်ပွဲကော်မရှင် အဆင့်ဆင့်ကို ပြန်လည်ပြင်ဆင်ဖွဲ့စည်းပေးရန် တောင်းဆိုထားကြောင်း သိရသည်။
လက်ရှိသမ္မတ ခန့်အပ်ထားသော ရွေးကောက်ပွဲကော်မရှင်တွင် တိုင်းရင်းသားများဘက်မှ သမာသမတ်ကျသည့် ပုဂ္ဂိုလ်တစ်ဦးတစ်ယောက်မျှ မပါရှိကြောင်း၊ ကော်မရှင် အဆင့်ဆင့်တွင်လည်း ပါစေလိုကြောင်း၊ လွတ်လပ်ပြီး တရားမျှတသည့် ရွေးကောက်ပွဲကော်မရှင်သည် လွတ်လပ်ရမည်ဖြစ်ကြောင်း၊ အထက်မှ အောက်ခြေအထိ ပြင်ဆင်သင့်ကြောင်း၊ ရွေးကောက်ပွဲကော်မရှင်သည် ပြည်သူများထောက်ခံသည့် ကော်မရှင်ဖြစ်သင့်ကြောင်း၊ ကော်မရှင်သည် လွှတ်တော်နှင့် မဆိုင်ကြောင်း၊ ရွေးကောက်ပွဲကော်မရှင်အား နိုင်ငံတော်သမ္မတက တိုက်ရိုက်ခန့်အပ်ထားသည် ဖြစ်သည့်အတွက် ပြန်လည်ဖွဲ့စည်းပေးရန် သမ္မတတွင် တာဝန်ရှိကြောင်း ညီနောင်တိုင်းရင်းသားပါတီများ ဖက်ဒရေးရှင်း၏ ပြောရေးဆိုခွင့်ရှိသူ ဦးစောသန်းမြင့်က ပြောကြားသည်။
No comments:
Post a Comment