ဇူလိုင်လ ၃၁ ရက်နေ့ထုတ် The Daily Eleven သတင်းစာ၏ အယ်ဒီတာ့အာဘော်
ကြိုတင်စီစဉ်ထားသော ပြောစကားများနှင့် ကုလသမဂ္ဂလူ့အခွင့်အရေး ကိုယ်စားလှယ်များ
ဇူလိုင် ၁၆ ရက်မှစတင်ကာ မြန်မာနိုင်ငံသို့ လာရောက်ခဲ့သည့် မြန်မာနိုင်ငံဆိုင်ရာ ကုလသမဂ္ဂလူ့အခွင့်အရေးဆိုင်ရာ အထူးကိုယ်စားလှယ် တောင်ကိုရီးယားနိုင်ငံသူ မစ္စရန်းဟီးလီသည် မြန်မာနိုင်ငံမှ အခြေအနေများကို လာရောက်လေ့လာခဲ့ပြီးနောက် ဇူလိုင် ၂၆ ရက်တွင် ပြန်လည်ထွက်ခွာသွားခဲ့သည်။
ကုလသမဂ္ဂ အထူးကိုယ်စားလှယ်အသစ်သည် ယခင်အထူးကိုယ်စားလှယ်ဟောင်း မစ္စတာကင်တားနား၏ လမ်းဟောင်းကိုသာ လျှောက်ခြင်းဟု ဆိုရမည်ပင်ဖြစ်သည်။ အဘယ့်ကြောင့်ဆိုသော် မစ္စတာကင်တားနား တာဝန်ထမ်းဆောင်ခဲ့သည့် သက်တမ်းအတွင်း လူနည်းစုဆိုသည့် အသုံးအနှုန်း၊ ခိုးဝင်ဘင်္ဂါလီအရေးနှင့် ပတ်သက်၍လည်း မြန်မာနိုင်ငံမှ ပြည်သူများမည်သို့မှ လက်သင့်မခံနိုင်သည့် ရိုဟင်ဂျာဆိုသည့် အသုံးအနှုန်းကို အကြိမ်ကြိမ်သုံးစွဲကာ နိုင်ငံသားဖြစ်ခွင့်အတွက် ဖိအားပေးခဲ့သည်။ အသိုင်းအဝိုင်း နှစ်ခုကြားဆက်ဆံရာတွင် မျှတသော ဘက်မလိုက် ဆက်ဆံရေးမျိုးထက် လူ့အသိုင်းအဝိုင်း တစ်ခုအပေါ် အထူးအရေးပေးမှုနှင့် ဆက်ဆံခဲ့သည်။ အကျိုးရလဒ်အားဖြင့် မစ္စတာကင်တားနား တာဝန်ထမ်းဆောင်နေချိန်တွင် မြန်မာနိုင်ငံသည် လူနည်းစုများကို အနိုင်ကျင့်နေသည့် အစွန်းရောက် ဗုဒ္ဓဘာသာဝင်များကြီးစိုးသော နိုင်ငံတစ်နိုင်ငံအဖြစ် ကမ္ဘာ့အလယ်တွင် အထင်အမြင်လွဲစေခဲ့သည်။ မစ္စတာကင်တားနားနှင့် မြန်မာနိုင်ငံ၏ လမ်းခွဲမှာ ကတ္တီပါလမ်းခွဲတစ်ခု မဖြစ်နိုင်ခဲ့သည့်အတွက် နောင်ရောက်ရှိလာမည့် ကုလသမဂ္ဂ အထူးကိုယ်စားလှယ် အသစ်အပေါ်ကို ပြည်သူများမျှော်လင့်ချက်ထားခဲ့သည်။ အထူးသဖြင့် အာရှနိုင်ငံသူတစ်ဦးဖြစ်ကြောင်း သိရှိခဲ့ရချိန်တွင် အမျှော်လင့်ကြီး မျှော်လင့်ခဲ့ကြသည်။ သို့သော်လည်း ပြည်သူများ မျှော်လင့်စောင့်ကြည့်ခဲ့သည့် မစ္စရန်ဟီးလီသည်လည်း မစ္စတာကင်တားနား၏ လမ်းဟောင်းကိုပင် လျှောက်လာပြန်သည်ကို ၎င်း၏ပြောဆို သုံးသပ်မှုများအရ မြင်တွေ့ရသည်မှာ စိတ်ပျက်ဝမ်းနည်းစရာဖြစ်သည်။
လက်ရှိ ကုလသမဂ္ဂလူ့အခွင့်အရေး ကိုယ်စားလှယ် အဆက်ဆက်၏ ပြောဆိုရှင်းလင်းမှုများသည် ၎င်းတို့အနေဖြင့် မြန်မာနိုင်ငံသို့ မလာရောက်မီ အချိန်ကတည်းကပင် မြန်မာနိုင်ငံနှင့်ပတ်သက်၍ ပြောဆိုစရာ ပြင်ဆင်ပြီးမှ လာရောက်နေကြသလိုမျိုး အများအမြင်တွင် ထင်မြင်လာစေပါသည်။ ဗုဒ္ဓဘာသာဝင်များ၏ ခံစားနေရမှုများ၊ တိုင်းရင်းသားများ၏ ဒုက္ခများကို မည်မျှပင်မျက်မြင် တွေ့ရှိသည်ဖြစ်စေ တကယ်တမ်း အခွင့်အရေးအကြောင်း ပြောဆိုသည့်အခါတွင်မူ မွတ်စလင်လူနည်းစု ဆိုသည့်အသုံးနှင့် ဘင်္ဂါလီများကိုသာ ဦးစားပေးပြောဆိုကာ မလိုလားအပ်သော အထင်အမြင်လွဲမှားမှုများကို ဖြစ်စေနိုင်သည့် သဘောသက်ရောက်စေသည်ကို မြင်တွေ့နိုင်ပါလိမ့်မည်။ အမှန်အားဖြင့် ဘင်္ဂါလီအရေး ကိစ္စများထက် ပိုမိုဆောလျင်စွာ ဖြစ်ပွားခဲ့သည့် ကချင်တိုင်းရင်းသား ဒုက္ခသည်များ အရေးသည်လည်းကောင်း၊ နယ်စပ်ဒေသရှိ မြန်မာနိုင်ငံသား ဒုက္ခသည်များ၏ အရေးသည်လည်းကောင်း အဖိနှိပ်ခံ ရိုဟင်ဂျာများဆိုသည့် ပြောဆိုမှုနောက်တွင် မှိန်သွားကြရသည်။ နှစ်ဦးနှစ်ဘက် အကျိုးဖြစ်ထွန်းစေနိုင်မည့် နည်းလမ်းများထက် လူ့အဖွဲ့အစည်းတစ်ဘက်ကိုသာ အပြစ်တင်ရင်း စိုးရိမ်ကြောင်းတွေကိုသာ ပြောဆိုနေကြသည်မှာ ဖြေရှင်းရန်အတွက် နည်းလမ်းတစ်ခု မဟုတ်ပေ။
ထို့ကြောင့် ကုလသမဂ္ဂ လူ့အခွင့်အရေး အထူးကိုယ်စားလှယ်များ အနေဖြင့် တစ်ဘက်တည်းကိုသာ အပြစ်တင်ပြီး ဘက်လိုက်ပြောဆိုမှုများ မပြုလုပ်ဘဲ အမှန်တကယ် ပြေလည်မှုရရှိနိုင်စေမည့် ပြောဆိုဖြေရှင်းမှုများကို မြန်မာပြည်သူ ပြည်သားများက များစွာမျှော်လင့်နေပါကြောင်း The Daily Elevenသတင်းစာက တိုက်တွန်းရေးသား အပ်ပါသည်။
No comments:
Post a Comment