ချယ်လ်ဆီးတိုက်စစ်မှူး လူကာကူအား အဲဗာတန်အသင်း ကလပ်စံချိန်တင်ပြောင်းရွှေ့ကြေးပေါင်(၂၈)သန်းဖြင့် ခေါ်ယူ

အဲဗာတန်အသင်းသည် ပြီးခဲ့သည့်ရာသီက အငှားဖြင့်ခေါ်ယူခဲ့သော ချယ်လ်ဆီးအသင်းတိုက်စစ်မှူး လူကာကူအား ကလပ်စံချိန်တင်ပြောင်းရွှေ့ကြေးဖြစ်သည့် ပေါင်(၂၈)သန်းဖြင့်ခေါ်ယူ စာချုပ်နိုင်ခဲ့ပြီဖြစ်ကြောင်း ဗြိတိန်ထုတ် Daily Mail သတင်းစာက ဖော်ပြခဲ့သည်။

အသက်(၂၁)နှစ်သာရှိသေးသူ ဘယ်လ်ဂျီယံလက်ရွေးစင်တိုက်စစ်မှူး လူကာကူသည် ပြီးခဲ့သည့်ရာသီက အဲဗာတန်အသင်းထံ အငှားဖြင့် ပြောင်းရွှေ့ကစားခဲ့ပြီး ခြေစွမ်းပြနိုင်ခဲ့သလို၊ ပရီးမီးယားလိဂ်တွင်(၃၁)ပွဲကစား (၁၅)ဂိုး သွင်းယူခဲ့သည်။ အဲဗာတန်အသင်းအနေဖြင့် လူကာကူအား ပြီးခဲ့သည့်ရာသီကုန်ကတည်းက အပြီးသတ်ခေါ်ယူရန် ဆန္ဒရှိခဲ့ပြီး ယခုအခါ ပေါင်(၂၈)သန်းဖြင့် ခေါ်ယူနိုင်ခဲ့ပြီဖြစ်ကြောင်း ဗြိတိန်မီဒီယာများက ဖော်ပြခဲ့သည်။ ထုိ့အတူ လူကာကူမှာလည်း သူ၏ Twitter စာမျက်နှာတွင် ၎င်းဓာတ်ပုံနှင့်အတူ “ကဏ္ဍသစ်တစ်ခု စတင်ရေးထိုးရမည့်အချိန်”ဟူ၍ ဖော်ပြခဲ့ကြောင်း သိရသည်။ လူကာကူသည် ၂ဝ၁၁ခုနှစ်က ဘယ်လ်ဂျီယံကလပ် အန်ဒါလက်ခ်ျအသင်းမှ ချယ်လ်ဆီးအသင်းသို့ ပြောင်းရွှေ့ခဲ့သူဖြစ်ပြီး ပုံမှန်ကစားခွင့်မရခဲ့ဘဲ စုစုပေါင်း(၁ဝ)ပွဲသာ ကစားခဲ့ရသလို ဝက်စ်ဘရွန်း၊ အဲဗာတန်အသင်းများထံ အငှားဖြင့် သွားရောက်ကစားခဲ့ရသည်။ လူကာကူအား ယခုနွေရာသီတွင် အက်သလက်တီကိုမက်ဒရစ်၊ ဝုလ်ဖ်ဘတ်အသင်းတို့က ခေါ်ယူရန် စိတ်ဝင်စားခဲ့သော်လည်း ၎င်းက အဲဗာတန်အသင်းသုိ့သာပြောင်းရွှေ့ရန် ဆန္ဒရှိခဲ့ခြင်းဖြစ်သည်။ လူကာကူ သည် အဲဗာတန်အသင်းနှင့် (၅)နှစ်သက်တမ်းရှိ စာချုပ်တစ်ရပ်ချုပ်ဆိုသွားမည်ဖြစ်ပြီး တစ်ပတ်လုပ်ခအဖြစ် ပေါင်(၇၅ဝဝဝ) ရရှိမည်ဖြစ်ကြောင်းလည်း Daily Mail သတင်းစာက ဖော်ပြခဲ့သည်။

အဲဗာတန်အသင်းသို့ ပြောင်းရွေှ့ခွင့်ရရှိခဲ့ပြီးနောက် လူကာကူက “အဲဗာတန်အသင်းမှာပြန်လည်ကစားရမှာဖြစ်လို့ ကျွန်တော်စိတ်လှုပ်ရှားနေပါတယ်။ ပြီးခဲ့တဲ့ရာသီက အဲဗာတန်အသင်းမှာ အတွေ့အကြုံကောင်းတွေရခဲ့သလို နည်းပြမာတီနက်ဇ်၊ အသင်းဥက္ကဌ၊ အသင်းဖော်တွေနဲ့သာမက ပရိသတ်တွေနဲ့ပါ ဆက်ဆံရေးကောင်းတွေ ရရှိခဲ့ပါတယ်။ လာမယ့်ရာသီမှာ အသင်းနဲ့အတူ အောင်မြင်မှုရယူနိုင်ဖို့ မျှော်လင့်ပါတယ်”ဟု ပြောကြားခဲ့သည်။