ရန်ကုန်မြို့တော်အတွင်း စွန့်ပစ်အမှိုက်များကို သိမ်းဆည်းခြင်းနှင့် အမှိုက်သယ်ယူ စွန့်ပစ်မှု လုပ်ငန်းကို လုပ်ကိုင်ခွင့်ရမည့် ကုမ္ပဏီများကို ဒီဇင်ဘာလတွင် ရွေးချယ်မည် ဖြစ်ကြောင်း ရန်ကုန်မြို့တော် စည်ပင်သာယာရေး ကော်မတီ၊ ပတ်ဝန်းကျင် ထိန်းသိမ်းရေးနှင့် သန့်ရှင်းရေး ဌာနမှ အကြီးတန်း အရာရှိတစ်ဦးက ပြောကြားသည်။
အဆိုပါ လုပ်ငန်းများနှင့် ပတ်သက်၍ ကနဦး လေ့လာ ဆောင်ရွက်နေသော ကုမ္ပဏီခုနစ်ခု ရှိကြောင်း၊ ၎င်းတို့၏ တင်ပြသော စဉ်းစားလက်ခံရန် ကမ်းလှမ်းချက် (Proposal) ပေါ် မူတည်ကာ ရွေးချယ်မည် ဖြစ်ကြောင်း ၎င်းက ရှင်းပြသည်။
အမှိုက်များ သိမ်းဆည်းခြင်း လုပ်ငန်းကို ပုဂ္ဂလိက လွှဲပြောင်းရန် ဧပြီလက တင်ဒါခေါ်ယူခဲ့ပြီး တင်ဒါ လျှောက်ထားသည့် ကုမ္ပဏီ ၁၂ ခု လျှောက်ထားခဲ့ပြီး ကုမ္ပဏီ ခုနစ်ခုက ကနဦး လေ့လာ ဆောင်ရွက်လျက် ရှိကြောင်း၊ ကနဦး ဆောင်ရွက်နေသော ကုမ္ပဏီများက အောက်တိုဘာလ ၃ ရက်နေ့တွင် Proposal ကို နောက်ဆုံးထား တင်ပြရမည် ဖြစ်ကြောင်း ပတ်ဝန်းကျင် ထိန်းသိမ်းရေးနှင့် သန့်ရှင်းရေး ဌာနထံမှ သိရှိရသည်။
လုပ်ငန်းစဉ်များကို ပုဂ္ဂလိကသို့ လွှဲပြောင်း လုပ်ကိုင်ခွင့်ပြုမည့် ကာလမှာ ၂၀၁၅ ခုနှစ် ဧပြီလ ၁ ရက်နေ့တွင် စတင်မည် ဖြစ်ပြီး ၁၀ နှစ်တာ လုပ်ကိုင်ခွင့် ရရှိမည် ဖြစ်ကြောင်း၊ လက်ရှိ ရန်ကုန်မြို့တော် စည်ပင်သာယာ နယ်နိမိတ်အတွင်း မြို့နယ် ၃၃ မြို့နယ်မှ တစ်ရက်လျှင် အမှိုက်တန်ချိန် ၁၆၀၀ ကျော် ထွက်ရှိကြောင်း ပတ်ဝန်းကျင် ထိန်းသိမ်းရေးနှင့် သန့်ရှင်းရေး ဌာန၏ စာရင်းများအရ သိရှိရသည်။
“အပြင်ကုမ္ပဏီက အမှိုက်သိမ်းမယ် ဆိုရင်တော့ စည်ပင်ထက် ပိုကောင်းနိုင်မယ်။ ဒါပေမဲ့ အခွန်အခ ပေးရတာ များမှာကို စိုးရိမ်တယ်” ဟု စမ်းချောင်းမြို့နယ်၊ စမ်းချောင်းလမ်းတွင် နေထိုင်သူ အိမ်ရှင်မ ဒေါ်ခင်သီတာဖြိုးက ပြောကြားသည်။
ကနဦး လေ့လာဆောင်ရွက်ခွင့်အတွက် ကြိုတင်ငွေ ပေးသွင်းထားသော ကုမ္ပဏီများမှာ TYTC Waste Equipment Pty: Ltd.(Australia)၊ ကျော်ထက်ကျော်၊ JSC INVEKS၊ AROSORA၊ Zeya & Associates၊ Future & Urodex၊ Advence Technology International တို့ ဖြစ်ကြောင်း ပတ်ဝန်းကျင် ထိန်းသိမ်းရေးနှင့် သန့်ရှင်းရေး ဌာနက ထုတ်ပြန်ထားသည်။
No comments:
Post a Comment