လက်ရှိတွင် ကြုံတွေနေရသည့် မီဒီယာပြဿနာများကို ဆွေးနွေးရန် မြန်မာနိုင်ငံ စာနယ်ဇင်းကောင်စီ (ယာယီ) နှင့် နိုင်ငံတော်သမ္မတ ဦးသိန်းစိန်တို့သည် သြဂုတ်လ ၁ ရက်နေ့တွင် ဒုတိယအကြိမ် တွေ့ဆုံမည်ဖြစ်ကြောင်း မြန်မာနိုင်ငံ စာနယ်ဇင်းကောင်စီ (ယာယီ) အဖွဲ့ဝင်များက ပြောကြားသည်။
သမ္မတနှင့် တွေ့ဆုံရန် ဇူလိုင်လ ၂၉ ရက်နေ့တွင် သမ္မတရုံးဝန်ကြီး ဦးအောင်မင်းမှ တစ်ဆင့် အကြောင်းပြန်ကြားခဲ့ခြင်း ဖြစ်ပြီး နံနက် ၁၀ နာရီတွင် နေပြည်တော်ရှိ သမ္မတ လယ်တောအိမ်တွင် တွေ့ဆုံမည် ဖြစ်ကြောင်း ၎င်းကဆိုသည်။
မြန်မာနိုင်ငံ စာနယ်ဇင်းကောင်စီ (ယာယီ) မှ ဒုတိယဥက္ကဋ္ဌ ဦးခင်မောင်လေး (ဖိုးသောကြာ (ခေတ်+မိုး)၊ အတွင်းရေးမှူး ဦးကျော်မင်းဆွေ၊ တွဲဖက်အတွင်းရေးမှူး ဒေါ်နန်းကလျာဝင်း၊ အဖွဲ့ဝင် ဦးဖေမြင့်၊ ဦးရဲမင်းဦး၊ ဦးဇော်သက်ထွေးနှင့် ဦးသီဟစောတို့ ပါဝင်မည် ဖြစ်ကြောင်း မြန်မာနိုင်ငံ စာနယ်ဇင်းကောင်စီ (ယာယီ) ထံမှ သိရသည်။
သတင်းမီဒီယာများကို စစ်ဆေး၊ မေးမြန်း၊ ဖမ်းဆီးသည့် ကိစ္စများအပြင် မဏ္ဍိုင်ကြီးများနှင့် မီဒီယာတို့ မည်ကဲ့သို့ ယုံကြည်မှု တည်ဆောက်မည် စသည့် အချက်များကို ခြုံငုံကာ ဆွေးနွေးသွားမည် ဖြစ်ကြောင်း စာနယ်ဇင်းကောင်စီ (ယာယီ) မှ အဖွဲ့ဝင် ဦးဇော်သက်ထွေးက ပြောကြားသည်။
နိုင်ငံတော်သမ္မတနှင့် စာနယ်ဇင်းကောင်စီတို့ ၂၀၁၃ ခုနှစ် နိုဝင်ဘာလ အတွင်းက ပထမအကြိမ် တွေ့ဆုံခဲ့ပြီး ဇူလိုင်လ ၁၄ ရက်နေ့တွင် ဒုတိယအကြိမ် တွေ့ဆုံနိုင်ရန် စာပေးပို့ခဲ့ခြင်း ဖြစ်ကာ ဇူလိုင် ၂၁ ရက်နေ့တွင် ယခင် ပြန်ကြားရေးဝန်ကြီး ဦးအောင်ကြည်နှင့်သာ တွေ့ဆုံခွင့် ရရှိခဲ့သည်။
မြန်မာငြိမ်းချမ်းရေးစင်တာသို့ လာရောက်သော နိုင်ငံတော်သမ္မတ ဦးသိန်းစိန်ကို သတင်းထောက်အချို့က ယူနတီဂျာနယ်မှ အမှုဆောင်အရာရှိချုပ် အပါအဝင် သတင်းထောက် ငါးဦးကို နိုင်ငံတော် လျှို့ဝှက်ချက် အက်ဥပဒေဖြင့် ထောင်ဒဏ် ၁၀ နှစ် ချမှတ်ခဲ့သည့်အတွက် ဇူလိုင်လ ၁၂ ရက်နေ့တွင် ဆန္ဒထုတ်ဖော်ခဲ့သည်။
တာဝန်ယူပြီး ရေးသားသူနှင့် တာဝန်ကင်းမဲ့စွာ ရေးသားမှုများကို သမ္မတအနေနင့် ကွဲကွဲပြားပြား သိစေလိုကြောင်း၊ သတင်းစာ၊ ဂျာနယ်များမှာ စနစ်တကျ ရေးသားနေသူများ ဖြစ်ကြောင်းကို သမ္မတ နားလည်အောင် ရှင်းပြနိုင်ပါက အစိုးရဌာနများနှင့် မီဒီယာတို့ နားလည်မှု ရရှိနိုင်မည် ယုံကြည်ကြောင်း မြန်မာဂျာနယ်လစ်ကွန်ရက်မှ တွဲဖက်အတွင်းရေးမှူး (၂) ဦးသန်းဌေးက ပြောကြားသည်။
No comments:
Post a Comment