မဲစာရင်းမှန်ကန်မှုရှိစေရေးအတွက် ဇွန် ၁၈ ရက်က ဇမ္ဗူသီရိမြို့နယ်၊ ရွှေကြာပင်ရပ်ကွက်အတွင်း တစ်အိမ်တက်၊ တစ်အိမ်ဆင်း မဲစာရင်းလိုက်လံကောက်ခဲ့သည့် ပါတီဝင်နှစ်ဦးမှာ မဲစာရင်းကောက်ယူအပြီး နှစ်ရက်အကြာတွင် ပိုက်နက်ကျူးလွန်မှုဖြင့် အမှတ် (၁)ရဲစခန်းတွင် အမှုဖွင့်ခံရခြင်းဖြစ်သည်။
တရားစွဲခံရသူနှစ်ဦးမှာ အမျိုးသားဒီမိုကရေစီအဖွဲ့ချုပ်(NLD)မှ ရွှေကြာပင်ရပ်ကွက်၏ မဲစာရင်းစိစစ်ရေးကော်မ တီဝင် ဦးစိန်မောင်မြင့်နှင့် ရပ်/ကျေးဥက္ကဋ္ဌဖြစ်သူ ဦးတင်ဌေးတို့ ဖြစ်သည်။
“ဒုရဲအုပ်တင်စိုးက မနေ့ကညနေက ကျွန်တ်ာတို့ရဲဘော်နှစ်ယောက်ကို လာပြီးတော့ တိုင်ထားပါတယ်။ ရဲစခန်းကို လာခဲ့ပါဆိုလို့ ကျွန်တော်အပါအဝင် ရဲစခန်းကို သွားပြီးတော့ ဒီနေ့ ထွက်ချက်သွားပေးတယ်” ဟု ဦးဆွေက ပြောသည်။
ပုဒ်မ ၄၄၇(ပိုက်နက်ကျူးလွန်မှု)ဖြင့် အမှုဖွင့်တိုင်ကြားသူမှာ ရွှေကြာပင်ရပ်ကွက်အုပ်ချုပ်ရေးမှူး၏ အိမ်ရှေ့ မျက်နှာချင်းဆိုင် ရှိ သော်က ၇ လမ်း၊ အိမ်အမှတ် ၇၈၄ တွင် နေထိုင်သည့် ဦးသက်ထွန်းဦး ဖြစ်ပြီး မဇ္ဈိမ က ၎င်းအား ဆက်သွယ်နိုင်ခဲ့ခြင်း မရှိပေ။
အမှုဖွင့်ခံထားရသည့် ဦးစိန်မောင်မြင့်ကမူ “ကျွန်တော်တို့က သူတို့အိမ်ရှေ့ရောက်တယ်။ မဲစာရင်းစစ်ချင်လို့ အိမ်ထဲဝင်လို့ ရမလား မေးတယ်။ သူတို့က ရပါတယ်။ ၀င်ပါဆိုလို့ ကျွန်တော်တို့ဝင်ပြီး မဲစာရင်းကောက်တာပါ။ ကျွန်တော်တို့ ဘာမှကျူးကျော် ၀င်ရောက်ခြင်း မရှိပါဘူး”ဟု ပြောသည်။
အမှုဖွင့်တိုင်ကြားခဲ့သည့် ဦးသက်ထွန်းဦး၏ အိမ်တွင် မဲပေးပိုင်ခွင့်ရှိသည့် အသက် ၁၈နှစ် ပြည့်ပြီးသူ ၃ ဦး ရှိကြောင်း မဲစာရင်းကောက်ယူစဉ် စာရင်းပေးခဲ့သေးသည်ဟုလည်း ဦးဆွေက ဆိုသည်။
အမျိုးသားဒီမိုကရေစီအဖွဲ့ချုပ်က ပြည်ထောင်စုရွေးကောက်ပွဲကော်မရှင်ဥက္ကဋ္ဌ ဦးတင်အေး၏ မဲစာရင်း မှန်ကန်ရေး အတွက် နိုင်ငံရေးပါတီများ ကူညီပေးရန် ယခုလ ၄ ရက် ရက်စွဲဖြင့် နိုင်ငံရေးပါတီများသို့ ပန်ကြားချက်အရ မဲစာရင်းများ လိုက်လံကောက်ယူနေခြင်း ဖြစ်သည်။
“ဘယ်ပါတီကိုပဲ မဲပေးပေး၊ အဓိက က ပြည်သူတွေရဲ့ မဲပေးပိုင်ခွင့် မနစ်နာစေဖို့ ကျွန်တော်တို့က မဲစာရင်းလိုက်ကောက်တာ”ဟု ဦးဆွေက ပြောသည်။
ပြည်ထောင်စုရွေးကောက်ပွဲကော်မရှင်က ထုတ်ပြန်ထားသည့် အခြေခံမဲဆန္ဒရှင်စာရင်းသည် ၃၀ ရာခိုင်နှုန်းမှ ၈၀ ရာခိုင်နှုန်းအထိ မှားယွင်းနေသည်ဟု ဝါရင့်အတိုက်အခံပါတီဖြစ်သည့် အမျိုးသားဒီမိုကရေစီအဖွဲ့ချုပ်က ယခု လဆန်းပိုင်းတွင် ထုတ်ပြန်ကြေညာ ထားသေးသည်။
Credit - Mizzima News
No comments:
Post a Comment