ရန်ကုန် (မဇ္ဈိမ)။ ။ ခုနစ်ကြိမ်မြောက် အပစ်အခတ်ရပ်စဲရေးဆွေးနွေးပွဲ
သတ်မှတ်နောက်ဆုံးရက် ရောက်ပြီဖြစ်သော်လည်း ဆွေးနွေးရန် ကျန်ရှိနေသဖြင့်
ရက်သတ္တပတ် တစ်ပတ်ကြာ ရပ်နားပြီးမှသာ ဆွေးနွေးပွဲ ပြန်လည်ပြုလုပ်မည်
ဖြစ်သည်။
နိုင်ငံလုံးဆိုင်ရာ
အပစ်အခတ်ရပ်စဲရေး ၇ ကြိမ်မြောက်ဆွေးနွေပွဲ ၆ ရက်မြောက်နေ့
သတင်းစာရှင်းလင်းပွဲကို မတ်လ ၂၂ ရက် ညနေ ၅ နာရီတွင် ကျင်းပပြုလုပ်နေစဉ်။
ထိုဆွေးနွေးပွဲကို ခေတ္တရပ်နားပြီး မတ်လ ၃၀ ရက်တွင် ပြန်လည်ဆွေးနွေးမည်ဟု
ပြောကြားခဲ့သည်။ (ဓာတ်ပုံ - သက်ကို၊ မဇ္ဈိမ)
စာချုပ်ပါ အချက်များအနက် လေးချက် ဆွေးနွေးရန် ကျန်ရှိနေခြင်းကြောင့် ခေတ္တရပ်နားလိုက်ရခြင်း ဖြစ်ပြီး ထိုအချက်များကို မတ် ၃၀ ရက်တွင် ပြန်လည်ဆွေးနွေးကြမည်ဟု နှစ်ဘက်ခေါင်းဆောင်များက ရန်ကုန်မြို့ မြန်မာငြိမ်းချမ်းရေးစင်တာတွင် မတ်လ ၂၂ ရက်က ပြုလုပ်သည့် ဆွေးနွေးပွဲအပြီး သတင်းစာ ရှင်းလင်းပွဲတွင် ပြောကြားလိုက်ခြင်း ဖြစ်သည်။
မြန်မာငြိမ်းချမ်းရေးစင်တာမှ အကြီးတန်းအရာရှိ ဦးလှမောင်ရွှေက “ကြားကာလမှာ ဘယ်လိုနေထိုင် မလဲဆိုတဲ့ အချက်တစ်ချက်ပဲ အဓိက ဆွေးနွေးရမှာပါ။ ကျန်တာကတော့ အပိုဒ်ငယ်လေးတွေပဲ ဖြစ်ပါတယ်”ဟု ပြောသည်။
အပစ်အခတ်ရပ်စဲရေး စာချုပ်၏ အခန်း (၆) ပါ “ကြားကာလ”ကို ပြန်လည်ဆွေးနွေးရမည်ဖြစ်ပြီး အခန်း (၃)၊ အခန်း (၄) ပါ အချက်အချို့ကို စာသားပြန်လည် ပြုပြင်ရန်ဖြစ်သည်ဟု ၎င်းက ဆိုသည်။
ကြားကာလ ဆိုသည်မှာ အပစ်အခတ် ရပ်စဲရေးစာချုပ် ချုပ်ဆိုပြီးနောက်ပိုင်း နိုင်ငံရေးဆွေးနွေးစဉ် တိုင်းရင်းသားလက်နက်ကိုင်တပ်ဖွဲ့များ မည်သို့နေထိုင်ရမည့် အစီအစဉ်ဖြစ်သည်။
ကြားကာလ အစီအစဉ် နှင့်ပတ်သက်၍ NCCT ကိုယ်စား ဖြေကြားသူ ဗိုလ်မှူးကြီး ခွန်ဥက္ကာက “ကျွန်တော်တို့ ဘက်က ဆန္ဒရှိတာက ပိုနေမြဲ ကြားနေမြဲ နေမယ်။ လက်နက်ကိုင်တပ်ဖွဲ့တွေလည်း သူ့နေရာနဲ့ သူရှိမယ်။ ပြည်နယ်လုံခြုံရေး ဖွံ့ဖြိုးရေးတွေ လုပ်မယ်။ ပြည်ထောင်စု အစိုးရဘက်က ဆန္ဒက ပူးပေါင်းဆောင်ရွက်မယ့် သဘောမျိုးဖြစ်တယ်” ဟု ဆိုသည်။
ခုနစ်ကြိမ်မြောက်ဆွေးနွေးပွဲတွင် အထက်ပါအချက်များ ပြေလည်စွာ ဆောင်ရွက်နိုင်ရေးအတွက် ခေတ္တရပ်နားထားမည့် ရက်များတွင် တိုင်းရင်းသား လက်နက်ကိုင်များ အချင်းချင်း ပြန်လည်ညှိနှိုင်း ဆွေးနွေးကြရ မည်ဟု ၎င်းက ဆိုသည်။
တစ်နိုင်ငံလုံးအတိုင်းအတာဖြင့် အပစ်အခတ်ရပ်စဲရေး သဘောတူစာချုပ် ချုပ်ဆိုနိုင်ရေးအတွက် ခုနစ်ကြိမ်မြောက် ဆွေးနွေးပွဲကို ပြည်ထောင်စုအဆင့် ငြိမ်းချမ်းရေး ဖော်ဆောင်ရေးလုပ်ငန်း ကော်မတီ(UPWC) နှင့် တစ်နိုင်ငံလုံး အပစ်အခတ်ရပ်စဲရေးဆိုင်ရာ ညှိနှိုင်းရေးအဖွဲ့(NCCT) တို့ မတ်လ ၁၇ ရက်က က စတင်ဆွေးနွေး ခဲ့ခြင်းဖြစ်သည်။
Credit - Mizzima News
No comments:
Post a Comment